Дүпсүҥҥэ Н.Е.Корнилов аатынан «Дүөндү» сынньалаҥ киинин кэлэктиибэ уонна олохтоох модельнай библиотека аҕам саастаах дьоммутугар аналлаах «Үөлээннээхтэр кэрэ кэмнэрэ» диэн олус истиҥ,бэһиэлэй оонньуулардаах ,бэртээхэй күрэстэрдээх,маастар кылаастардаах тэрээһиннэри ыыттыбыт.
Алтынньы 9 күнүгэр олохтоох модельнай библиотекаҕа “Госуслуги” порталга хайдах киирэн регистрацияланарга, уоту хайдах төлүүргэ, социальнай сети уонна компьютеры хайдах туһанарга маастар-кылаас ыытылынна, оттон алтынньы 9 күнүгэр «Дүөндү» сынньалаҥ киинигэр сынньалаҥ биэчэр буолан ааста. Ытык, бэлиэ күҥҥэ туһаайан аҕам саастаахтарга итии чэйдээх, минньигэс астаах кыракый, сэмэй остуол тэрилиннэ. Бу күн көрдөөх эстафета, айылҕа матырыйаалыттан оҥоһуктар күрэстэрэ, хобби-быыстапка, күһүҥҥү тиэмэҕэ сэлээппэ, хаалтыс күрэһэ буолла. Манна Марфа Сивцева, Прасковья Прибылых, Варвара Прибылых «Дьүөгэлэрим бэлэхтэрэ – мин сүрэхпэр» диэн олус интэриэһинэй хобби быыстапкаларын аҕалан көрдөрдүлэр. Айылҕа матырыйаалыттан оҥоһуктар күрэстэригэр 4-с миэстэни Прасковья Прибылых, 3-с миэстэни Варвара Прибылых, 2-с миэстэни Мария Николаевна Сивцева, 1-кы миэстэни Мария Дмитрьевна Сивцева ылары ситистилэр. Хаалтыс күрэһэр үһүс миэстэ Марфа Сивцева, иккис миэстэ Анастасия Сивцева, бочуоттаах бастакы миэстэни Прасковья Прибылых. Олус дьэрэкээн сэлээппэлэри оҥостон, үһүс миэстэни Мария Нартахова, иккис миэстэни Мария Сивцева, бастакы миэстэни Анна Козлова ыллылар. Спортивнай күрэстэргэ «Күөрчэх ытыйыы» саамай уһун бириэмэҕэ ытыйан, бастакы миэстэни Анастасия Сивцева ылла, иккис миэстэ Зоя Алексеева, үһүс миэстэ Марфа Сивцева буоллулар.
Көрдөөх эстафетаҕа түөрт хамаандаҕа арахсан күрэстэстилэр. Олус бэһиэлэй, интэриэһинэй күрэс түмүгүнэн 4-с миэстэни «Три сетрицы», 3-с миэстэни «Балаҕаннаах», 2-с миэстэни «Күбэйэ» уонна 1-кы бочуоттаах миэстэни «Сибэкки» хамаанда ылары ситистилэр. Күндү дьоммут араас оонньууларга оонньоон, сэргэхсийэн, үөрэн-көтөн тарҕастылар.
Күннэтэ сүбэ-ама, күүс-көмө буола сылдьар кырдьаҕас эбэлэрбитин-эһэлэрбитин, ийэлэрбитин-аҕаларбытын, кинилэр сылайары да аахсыбакка үлэлээн, дойду олоҕун тутуспуттарыгар, сайдыыны түстэспиттэригэр сүгүрүйэбит, күндү дьоммутугар барҕа махталбытын тиэрдэбит.
Светлана Нартахова, «Дүөндү» сынньалаҥ киинин уус-уран салайааччыта
