Бүгүн алтынньы 10 күнүгэр “Дүөндү” сынньалаҥ киинигэр аҕам саастаахтарга аналлаах “Истиҥ көрсүһүү” бырааһынньыктааҕы тэрээһин үрдүк таһымнаахтык буолан ааста. Бырааһынньыктааҕы тэрээһиммит остуол тула олорон итии-истиҥ кэпсэтиинэн саҕаланна. Мустубут дьон ааспыты санаан, олохторун кэпсээн, нэһилиэктэр икки ардыларынааҕы сибээһи бөҕөргөтөр туһунан сэһэргэстилэр. Аҕам саастаахтар күннэринэн эҕэрдэлээн Дүпсүн орто оскуолатын үөрэнээччилэрэ эҕэрдэ ырыалары, үгэни, хомус дьүрүскэн тыаһын бэлэхтээтилэр. Дүпсүн нэһилиэгин олохтоох дьаһалтатын солбуйар баһылыга Арсалан Антонович Прибылых эҕэрдэ тылын, 50 сыл бииргэ олорбут Прасковья Дмитриевна, Николай Иннокентьевич Стручковтарга, 80 саастарын туолбут Матрена Петровна Прибылыхха, Елизавета Васильевна Алексееваҕа, Розалия Васильевна Неустроеваҕа эҕэрдэ суруктарын, бэлэхтэри уонна Варвара Дмитриевна Прибылыхха өр сылларга Дүпсүн нэһилиэгин инбэлииттэрин обществотын председателинэн үлэлээбит ситиһиитин сыаналаан ОООИ ВОГ президенэ А.А.Бочков анаабыт “Отличник всероссийского общества глухих” түөскэ кэтиллэр бэлиэни туттартаата.
Найахыттан кэлбит ытык дьоммут бэйэлэрин таһымнарын көрдөрөн, эҕэрдэ нүөмэрдэрин толордулар, бэйэлэрин баҕа санааларын тиэртилэр. Кинилэр кэлэннэр бырааһынньыкпыт өссө тупса, сэргэхсийэ түстэ.Аҕам саастаах дьоммут араас интэриэһинэй оонньууларга, викториналарга олус көхтөөхтүк кыттан, ыллаан, үҥкүүлээн, эдэр саастарын санаан ыллылар.
Күндү дьоммутун бүгүҥҥү бырааhынньыкка кэлэн ыалдьыттаабыккытыгар, сырдык, сылаас истиҥ мичээргитин бэлэхтээбиккитигэр, үөрүүгүтүн үллэстибиккитигэр барҕа махталбытын тиэрдэбит! Эһиги хараххыт сырдыга, эһиги сүбэҕит-амаҕыт биһигини өрүү араҥаччылыа турдаҕа. Доруобай буолуҥ, уһун үйэлэниҥ!
Икки нэһилиэк икки ардыгар доҕордоһуу сибээһэ өссө да бөҕөргүү турдун!
Бүгүҥҥү тэрээһиммитигэр сибиэһэй этинэн күндүлээбит Дүпсүннээҕи ЖКХ коллективар (нач. Иван Тимофеевич Тордуянов) бары аҕам саастаахтар ааттарыттан барҕа махтал тылларбытын тириэрдэбит .
