Алтынньы 23 күнүгэр “Дүөндү” сынньалаҥ киинигэр биир умнуллубат, дьон сүргэтин көтөҕөр тэрээһин буолла.
Ол курдук Найахы, Лөгөй, Мүрү, Чараҥ, Дүпсүн 60-рын ааспыт аҕам саастаахтара “Кэхтибэт талаан” бэстибээлигэр кытыннылар. Кырдьык даҕаны, эдэр саастарыгар дьон кутун тутан ыллаабыт ырыаһыттарбыт, үҥкүүһүттэрбит, көрдөөх-нардаах сценкаһыттарбыт чахчы да кэхтибэт талааннарын сөҕө-махтайа көрдүбүт, дьон-сэргэ этэригэр дылы “төттөрү эдэр сааспытыгар түһэн ыллыбыт”.
Дүпсүн нэһилиэгин ыччаттара бэстибээл кыттыылаахтарын чороонноох кымыһынан, итии алаадьынан көрсүбүттэрин, аҕам саастаах кыттааччыларбытын уруйдаан-айхаллаан үҥкүүлээбиттэрин олус диэн астыннылар.
Улуустааҕы бэтэрээннэр Сэбиэттэрин бэрэссэдээтэлэ Иван Иванович Колодезников «Дүпсүннэргэ көлүөнэ ситимэ чаҕылхайдык көһүннэ» диэн бэлиэтээн эттэ. Тэрээһин кыттыылаахтара бу соторутаа5ыта 91 сааһыгар олохтон барбыт Дүпсүн нэһилиэгин ытыктанар кырдьаҕаһа, Саха АССР үтүөлээх зоотехнига, РСФСР тыа хаһаайыстыбатын туйгуна, улуус уонна Дүпсүн нэһилиэгин Бочуоттаах олохтооҕо, уус-уран самодеятельность актыыбынай кыттыылааҕа Сивцева Татьяна Константиновна сырдык аатыгар тохтобул биллэрэн чуумпуран ыллыбыт. Эҕэрдэ тылы Дүпсүн нэһилиэгин тыа сирин түөлбэтин дьаһалтатын специалиһа Майя Прибылых кэлбит нэһилиэктэргэ Дүпсүн нэһилиэгин баһылыгын аатыттан эҕэрдэ суруктары, өйдөбүнньүк бэлэхтэри туттарда.
Кэнсиэр Дүпсүн ыччаттарын эҕэрдэ үңкүүтүнэн (сал. Ньургуйаана Прядезникова) саҕаламмыта аҕам саастаах дьоммутугар ытыктабыл, сүгүрүйүү бэлиэтин курдук ылынан, бэстибээл кыттыылаахтара дохсун ытыс тыаһынан махталларын биллэрдилэр. Ыытааччылар Дүпсүнтэн Тамара Михайлова, Лөгөйтөн Марианна Фред, Мүрүттэн Мария Петухова, Найахыттан Светлана Петрова, Чараңтан Екатерина Свинобоева бэйэлэрин нэһилиэктэрин ылбаҕай, истиҥ тылларынан билиһиннэрдилэр.
Бу күн Дүпсүн сирэ 150 киһини көрсөн кэнсиэр кэнниттэн Дүпсүн тэрилтэлэрин көмөлөрүнэн тэриллибит мааны астаах фуршеты сөҕө-махтайа көрөн, астына амсайан, дуоһуйа кэпсэтэн, Найахыттан Федор Петров, Чараҥтан Николай Бурцев ырыаларын астына-дуоһуйа истэн, эдэр саастарын санаан үҥкүүлээн олус астынан, махтал тылларын этэн тарҕастылар. Бэстибээл дьууллуур сүбэтин бэрэссэдээтэлэ Анна Егоровна Лугинова «Бэстибээли Дүпсүннэр үрдүк тэрээһиннээхтик тэрийэн ыыттыгыт» диэн махтал тылын эттэ.
Бэстибээлгэ Дүпсүнтэн 42 аҕам саастаах кытынна. Күндү “Далбар” үҥкүү, “Иэйии” ырыа ансаамбыл кэллэктиибигэр, уус-уран ааҕыыга, уопсай көстүүгэ кыттыбыт дьэдьэнньиттэрбитигэр, отчуттарбытыгар, көрдөөх сценканы көрдөрбүт Бээдибит кырдьаҕастарыгар, фуршеты тэрийиигэ көмөлөспүт бары тэрилтэлэрбитигэр, түмсүүлэрбитигэр, үҥкүүһүт ыччаттарбытыгар итии-истиҥ махталбытын тиэрдэбит. Түмүккэ Дүпсүнтэн «Далбар» үҥкүү бөлөҕө (сал.Е.П.Алексеева) лауреат үрдүк ааты ылары ситистэ, соло толоруутугар Светлана Иннокентьевна Алексеева дипломант буоланнар үөрүүбүтүн үксэттилэр.
Быйыл улууспутугар биллэриллибит Түмсүү уонна бииргэ үлэлээһин сылыгар маннык тэрээһиннэр тэриллэннэр дьоммут-сэргэбит биир өйгө-санааҕа түмсэн иннибит диэки эрэллээхтик хардыылыаҕың, айыаҕың-тутуоҕуң!
