2022 сыл күһүнүгэр анал байыаннай дьайыыга диэн соһуччу хомуур Сахабыт сирин атыйахтаах уулуу аймаабыта. Бу хомуурга Дүпсүнтэн Слава Кудрин эмиэ ыҥырыллан, дойдутун туһугар иэһин төлүү аттаммыта. Кини бу иннинэ 1994-1995 сс. Чечня сэриитигэр сыл устата сэриилэспит, уопуттаах байыас этэ.
Вячеслав Владимирович Кудрин Уус Алдан Дүпсүнүгэр 1976 с. олунньу 29 күнүгэр биэс оҕолоох дьиэ кэргэҥҥэ маҥнайгы оҕонон күн сирин көрбүтэ. Ийэтэ Наталья Иннокентьевна, аҕата Владимир Семенович Кудриннар диэннэр. Эһэтэ Иннокентий Сергеевич Стручков I уонна аҕата Владимир Семенович байанайдаах булчут буоланнар, кыра Славаны булка-алка уһуйбуттара. Үлэһит, сүрэхтээх дьиэ кэргэҥҥэ иитиллэн, бэйэтэ да араас үлэҕэ сыстаҕас, булт диэн баран «муннукка ытаабыт» эр бэрдэ буола улааппыта. Дьөһөгөй оҕотугар сыстаҕаһа, таптаан миинэр миҥэ оҥосторо.
Слава киһи быһыытынан көнөтүн, элэккэйин, доҕотторугар чахчы бэриниилээҕин сыаналаан, билиҥҥээҥҥэ диэри доҕотторо сүрдээҕин суохтууллар, ахталлар, тулаайах хаалбыт ийэтигэр күүс-көмө буолаллар. Эдэркээн сааһыгар икки сэрии уоттаах толоонугар инники кирбиигэ сэриилэһэн, сүрэҕэ тулуйбакка бу олохтон эрдэ барбыта сүрдээх хомолтолоох.
Слава ыччат лидеринэн, спортинструкторынан үлэлии сылдьыбыта. Спордунан сөбүлээн дьарыктанара. 2019 с. волейболга ветераннарга улуус чемпиона буолан үөрбүттээҕэ. Түөлбэтин, нэһилиэгин чиэһин элбэхтик араас күрэхтэһиилэргэ туруулаһан көмүскээбитэ, куруук түмэр, тэрийэр лидерскэй майгылааҕа.
Наҕараадалара:
- «Участник боевых действий на Кавказе» мэтээл.
- «Защитник Отечества» мэтээл.
- «За бои в Чечне» бэлиэ.
- «За боевые услуги» мэтээл.
- «25-летие Чеченской войны» мэтээл.
- «25 лет Ассоциации ветеранов боевых действий органов внутренних дел и войск РС (Я)» үбүлүөйдээх мэтээл.
Вячеслав Владимирович бу олорон ааспыт кылгас олоҕор, баара-суоҕа 47 сааһыгар икки сэрии уот кутаатын ортотунан бойобуой эбээһинэһин чиэстээхтик толоро сылдьан, 2023 сыллаахха улахан эчэйиини ылан дойдутугар эргиллибитэ. Кини, икки сэрии кыттыылааҕа, Ийэ дойдутугар бэриниилээх буойун, бар дьонугар үтүө холобур буолан үйэлэргэ хаалыаҕа.
Бу дьыл олунньу 21-22 күннэригэр оскуола оҕолоругар «Эдэр байыас» спортивнай уонна улахан дьоҥҥо буулдьанан ытыы күрэстэрин Вячеслав Кудрин сырдык кэриэһигэр бииргэ төрөөбүттэрэ, ийэтэ Наталья Иннокентьевна тэрийэн ыытыахтара. Бу күрэхтэһиилэр сылын аайы Слава төрөөбүт ыйыгар анаан ыытыллаллара былааннанар.
Агафья Сивцева — Дүпсүүнэ