Дүпсүн нэһилиэгэр саха санаалаах барыта санаата көнөр, сандал сааспыт салаллан кэлбитинэн уонна Аан дойду кэрэ аҥаардарын күннэригэр анаан сарсыарда 11 чаастан Дүпсүн нэһилиэгин герой ийэлэрин ааттарын үйэтитэр сыаллаах тутуллубут Ийэ скверигэр, тапталлаах ийэлэрбитин, амарах эбээлэрбитин ахтан санаан тураммыт, тыыннаах сибэкки дьөрбөтүн уурдубут. Ийэлэрбит, эбээлэрбит ааттарын үйэтитэр, «Ийэҕэ махтал» сквербыт 2015 сыллаахха, «Сардаана» кийииттэр түмсүүлэрин көҕүлээһиннэринэн, нэһилиэкпит дьаһалтата өйөөн, олоххо киирбитэ – өрөспүүбүлүкэҕэ маҥнайгынан тутуллубут Ийэҕэ аналлаах сквердарыттан биирдэстэрэ буолар. Быйыл «Ийэҕэ махтал» сквербит тутуллубута 10 сыла буолар.
Ол кэннэ киэһээ биэс чаастан «Дүөндү» сынньалан киинигэр «Дүпсүн Далбар Хотуна» диэн тэрилтэлэрбит кэрэ кыргыттарын, Далбар хотуттарын икки ардыларыгар күрэх бэрт сэргэхтик буолан ааста. Күрэх кыттааччылара бэйэни билиһиннэрииттэн са5алаан талба талааннарын, дьо5урдарын көрдөрдүлэр. Күрэхпит 5 түһүмэхтэн турда. Ол курдук, бастакы түһүмэх – бэйэни билиһиннэрии. 2 түһүмэх – боппуруоска эппиэттэр. Кыттааччылар 1 мүнүүтэ иһигэр бэриллибит боппуруостарга эппиэттээтилэр. 3 түһүмэх — «Мин нарыммын-намчыбын, үҥкүүлээн сэгэйэбин, ыллаан эйээрэбин» диэн ааттаах талаан көрдөрүүтэ. Төрдүс түһүмэҕинэн буолла минньигэс ас күрэҕэ. Далбар хотуттарбыт астаабыт астарын биһиги иннибитигэр көрдөрдүлэр, кэпсээтилэр. Бэһис түһүмэх — «Харах иҥнэр кэрэтэ» киэһээҥҥи былааччыйалары кэтэн хаамтылар. Бу киэһээни иилээн – саҕалаан ыыттылар Светлана Нартахова, Дмитрий Румянцев. Түһүмэхтэр быыстарыгар эҕэрдэ ырыаларын Айнура Стручкова, Наталья Бочкарева, Наталья Соловьева, Оксана Нестерова бэлэх ууннулар. Күрэх сыаналыыр сүбэтигэр Дүпсүн нэһилиэгин олохтоох дьаһалтатын баһылыга Николай Николаевич Сивцев, Дүпсүн нэһилиэгин бочуоттаах олохтооҕо Семен Николаевич Алексеев, Дүпсүн нэһилиэгин спорт инструктора Вадим Николаевич Сивцев, В.В.Никифоров – Күлүмнүүр аатынан оҕону эбии үөрэхтээһин технопаркатын салайааччыта Гаврил Гаврильевич Кудрин, Дүпсүннээҕи баһаарынай чаас караул начальнига – Александр Александрович Дорофеев үлэлээтилэр.
Быйылгы «Дүпсүн Далбар Хотуна» күрэх түмүгэ хайдах буолла. «Миссис Гениальность» Юлия Прибылых, «Миссис Хозяюшка» Сахаяна Федорова, «Миссис Креативность» – Парасковья Барабанская, «Миссис Талант» – Алена Сыроватская, «Миссис Элегантность» – Ньургуйаана Ушницкая ыллылар. Уонна дьэ, «Дүпсүн Далбар Хотуна» анал ааты ылла Ньургуйаана Ушницкая. Кыттааччыларбыт грамотанан, лентанан, сыаналаах бириистэринэн наҕараадаланнылар.
Быйылгы «Дүпсүн Далбар Хотуна» күрэхпит сааскы маҥнайгы бырааһынньык кэрэ, мааны бэлэҕэ буолан, мустубут дьоҥҥо үөрүүнү, дуоһуйууну бэлэх уунна.
