Алтынньы 29 күнүгэр Дүпсүн нэһилиэгэр Саха сирин комсомолун күнүгэр анаммыт «Эдэр сааһым аргыһа — Комсомол» диэн үөрүүлээх уонна истиҥ көрсүһүү буолан ааста. Бырааһынньыктааҕы биэчэргэ нэһилиэк олохтоохторо, урукку сылларга ыччат хамсааһынын актыбыыстара, комсомольскай тэрилтэ сэкирэтээрдэрэ уонна эдэр көлүөнэ ыччат бэрэстэбиитэллэрэ муһуннулар. Тэрээһин Өрөспүүбүлүкэ араас муннуктарыттан сылдьар комсомоллар парадтарынан уонна дуорааннаах ырыаларынан арылынна. Комсомол ветераннара бэйэлэрин эдэр саастарын, тутуу этэрээттэригэр үлэлээбит үлэлэрин, уоттаах-төлөннөөх комсомольскай мунньахтар, күүрээннээх субботниктар уонна умнуллубат романтикалаах походтар, стройотрядтар кэмнэрин туһунан истиҥник кэпсэттилэр. Кинилэр кэпсээннэрэ бүгүҥҥү ыччакка улахан интэриэһи тарта. Ол курдук үрдүк эппиэтинэстээх буолуу чаҕылхай холобурдарын истэн, комсомолга киирии олохторугар биир туспа умнуллубат кэрдиис буолан эттэригэр — хааннарыгар иҥмит ахтыыларын киэн тутта иһиттилэр.
Күрүлгэннээх эдэр саас ырыаларын бары биир киһи курдук күргүөмүнэн ыллаатылар. Ону тэҥэ комсомол устуоруйатыгар аналлаах «Өркөн өй» викторина ыытылынна. Манна кыттааччылар ВЛКСМ устуоруйатын, Саха сиригэр ыччат хамсааһына хайдах сайдыбытын туһунан ыйытыыларга көхтөөхтүк хоруйдаан, комсомол историятын, устабын билигин да билэллэринэн сөхтөрдүлэр. Урукку кэминээҕи истииллээх ретро — мода, “Эдэр сааһым өйдөбүллэрэ” быыстапка дьон интэриэһин тарта. Урукку хаартыскалары керен, хаһыат ыстатыйаларын ааҕан чахчы да сирэйдэрэ сырдаан эдэр саас эрчимнээх кэмнэрин санастылар. Тэрээһиммит сүрүн күрэҕинэн икки хамаандаҕа хайдан комсомол ырыаларыгар батл ыытылынна. Бары олус көхтөөхтүк кыттан, хайа да хамаанда иннин биэрбэккэ доҕордоһуу кыайда, түмүк ырыа ылланна.
Бу көрсүһүү хас биирдии киһиэхэ сылаас өйдөбүлү, эрчимнээх күүһү уонна доҕордоһуу тыыннаах сырдык иэйиитин бэлэхтээтэ. Комсомол — ол кэмнээҕи ыччат эрэ олоҕо буолбакка, бүгүн даҕаны биһиги сүрэхпит тэбэрин күүһүрдэр, инникигэ кынаттыыр эдэр сааспыт өрүү тыыннаах аргыһа буоларын өссө төгүл бигэргэттибит.
