Маастар кылаас темата:
- Өбүгэлэрбит итэҕэл өйдөбүллэринэн эйгэҕэ үлэлии турар сакральнай оһуордар, оһуордары ис өйдөбүллэрин быһаарыы;
-Станогунан ситии хатыыта;
-8 утахтаах тымырдаайы өрүүтэ;
-Түөрт кырыылаах быа өрүүтэ;
-Салама оҥоһуута, быһааран, көрдөрөн биэрии.
Маастар кылааска кыттан дьоҕурбутун уһугуннаран, сатабылбытын сайыннаран элбэххэ үөрэннибит, оһуордар ньэмиэттэрин түһэрэн ыллыбыт, ситии хатар станок атыыластыбыт👍 Матрена Михайловна төрөөбүт дойдутун дьонугар сэргэтигэр быйыл төрдүс маастар кылааһын ыытта, сырыы аайы бэлэхтээх кэлэр. Ол курдук 3 эр киһи дэйбиирдэрин, 5 тымырдаайы, 6 туос ыаҕайа, 5 түөскэ кэтэр сиэлинэн киэргэл бэлэхтээбитэ. Онтон бу сырыыга кэһэх оһуор — удьуор утума диэн туостан оҥоһуллубут алгыстаах харысхал уонна түмсүүтүн туһунан альбомун бэлэх уунна.
Алдан эбэ маанылаах туоһуттан, талах курдаах Таатта талаҕыттан иилээн, дьөһөгөй оҕотун сиэлин ситиинэн хатан сүрэҕин дууһатын иэйиитин, тарбаҕын сылааһын иҥэрэн оҥорбут бэлэхтэрин Матрена Михайловна кулууппут фондата кэҥииригэр, өбүгэ үгэһин утумнаан салгыы үлэбитигэр туһанарбытыгар анаан бэлэхтээбит оҥоһуктара буолар.
Норуот маастара Матрена Михайловна төрөөбүт дойдубут төрүт культурата сайдарыгар, кэлэр кэскилэ кэрэни эрэ кэрэхсиирин, үтүөнү эрэ үксэтэрин туhугар анаан оҥорбут үтүө кылаатын бар дьонун бары билинэр, махтанар
Күндү Матрена Михайловна!Төрөөбүт дойдугутугар муҥура суох тапталгыт, ахсаабат кыһамньыгыт, эйэҕэс сыһыаҥҥыт, болҕомтоҕут, куруук өйөбүл-тирэх буоларгытын иһин барҕа махталбытын тиэрдэбит.Баҕарабыт айылҕаттан анаммыт талба талааҥҥыт өссө да бар дьоҥҥо үтүө өйдөбүл, кэрэ бэлэх буолан сырдыкка, кэрэҕэ, үтүөҕэ кынаттыы турдуннар!