Бэс ыйын 27 күнүгэр Дүпсүн нэһилиэгин Бээди бөһүөлэгэр Арассыыйаҕа педагог уонна наставник, Саха өрөспүүбүлүкэтигэр үлэ, Уус Алдаҥҥа инфраструктура, Дүпсүн нэһилиэгэр тупсарыныы сылларыгар аналаах «Алаас ахтылҕана» ыһыах ыытылынна. Ыһыах 10:00 ч. бөһүөлэккэ сэрии кыттыылаахтарыгар, тыыл үлэ ветераннарыгар, сэрии сылын оҕолоругар, Герой ийэлэргэ аналлаах «Албан аат скверин» аһыллыытынан саҕаланна. Тэрээһиҥҥэ улуус баьылыга Алексей Васильевич Федотов кыттыыны ылла. Алексей Васильевич сквер аһыллыбытынан олохтоохтору эҕэдэлээтэ, улахан үлэ барбытын бэлиэтээтэ уонна манна үлэлээбит, түмсүбүт дьоҥҥо сэргэҕэ Уус Алдан улууһун дьаһалтатын аатыттан махталын тириэртэ. Бу тутуу бөһүөлэк историятыгар улахан суолталааҕын, ааспыт кэмҥэ кимнээх олорон ааспыттарын, аҕа дойду сэриитин кыттыылаахтарын, бөһүөлэк туһугар кылааттарын киллэрбит дьон ааттара үйэттэн үйэҕэ хаалан, көлүөнэттэн көлүөнэҕэ бэриллэн, ааспыты санатан ыччаты үтүөҕэ-кэрэҕэ угуйа, ийэ дойдуга бэриниилээх буолууну, аҕа көлүөнэҕэ махтал бэлиэтэ буоларын бэлиэтээтэ. Салгыы уйгу-быйаҥ ыһыах киэҥ нэлэмэн эбэҕэ ыһыахтыыр түһүлгэҕэ ыытылынна. Аҕам саастаах дьоннорго анаан өбүгэ оонньуута «күөрчэх ытыйыы», оҕолорго «хомуур күрэх», үлэ сылынан «Туойуоҕуҥ үлэ киһитин» ырыаҕа күрэх, оҕолорго «Алаас симэхтэрэ» сахалыы таҥас күрэҕэ ыытылыннылар. Ону тэҥэ спортивнай күрэхтэр уонна сылын аайы ыытыллар «Алаас Боотура» эдэр ыччаттар икки ардыларыгар боотурдар күрэхтэрэ олус тыҥааһыннаахтык аастылар.
